車路士又失分，喺周日英超主場迎戰另一支倫敦球隊韋斯咸慘被1:1逼和，近五場聯賽只係贏得一場，剩返六場波仲落後第四位熱刺10分，爭前四非常危殆，領隊干地下季仲可以留喺車仔真係唔多樂觀。車仔失分冇面，對手韋斯咸球迷仲不忘落井下石，喺追成平手時掟支假陽具（小圖）落球場奚落車仔。
場內場外悼念韋健士
藍戰士今場賽前喺史丹福橋球場舉行悼念活動，紀念上星期因心臟病離世嘅車路士名宿及助教韋健士，球會仲喺球場外面設置咗一個區域，等球迷可以放置鮮花同紀念品，向呢位一代名將致意。韋健士離世固然令唔少球迷傷心，不過相信好多車路士球迷睇完呢場波就更加傷心。藍戰士今場早段都算有板有眼，23分鐘先有艾華路莫拉達單刀射入，可惜被判越位慘食詐糊。
到36分鐘，後上助攻嘅艾斯派古達門前快腳篤入先開紀錄，不過見場邊嘅干地都好似唔識笑咁，以前嗰啲激情完全冇晒，都估到佢同球隊嘅士氣有幾咁低落。莫拉達喺58分鐘接應韋利安傳中射入，不過又一次被判越位，認真陰公！
干地帥位唔樂觀
韋斯咸喺70分鐘換入後備殺手查維亞靴南迪斯「小豆」一出場就即刻有貨交，落場兩分鐘就接應阿拿奧杜域後傳，喺12碼點附近起腳建功追成平手。「小豆」入球之後，有韋斯咸球迷仲向車路士嘅龍門投擲一支黑色假陽具「贈興」，令一班車路士球員冇面兼冇癮。最後雙方踢成1:1完場，藍戰士喺大好形勢下又失兩分，賽後已經畀同日贏波嘅阿仙奴追剩三分，隨時第五都保唔住。
干地賽後就話對賽果感到失望，同時承認球隊的確存在問題：「喺呢類原本應該贏波嘅比賽失分，失望係必然嘅，但係我哋今季已經唔止一次係咁，如果球隊經常遇到呢啲情況嘅話，就表示其實好有問題。」干地失望，不過相信車路士嘅班主阿巴莫域治仲失望，事關車仔喺最近五場英超只係贏得一場，歐聯席位凍過水，睇嚟干地今季之後都係咁先。