澳洲籍騎師貝湯美認真行運，因為胃痛退出剛次（8日）沙田日馬，冇得騎本來少咗收入，但正因為冇份跑，避過「友歡笑」墮馬一劫，雖然代佢策「友歡笑」嘅韋達都冇乜事，但如果貝湯美騎上去，又可能有另一種跌法，分分鐘有性命危險。
今朝（9日）湯美仔精精神神現身，既有操馬又同文家良等練馬師密斟，動態積極，看來佢嘅胃痛只係芝麻綠豆小事，周三（11日）夜賽勢可如常上陣。
今期湯美仔有六匹座騎，分別是「七星拱照」、「青年軍」、「紅旗星將」、「睡眠大學」、「勇冠王」及「光芒再現」。
其中湯美仔今朝只親操第六場三班1650米的「睡眠大學」，明顯對呢匹馬零舍重視，此駒前仗1400米拼入季軍只輸不足一馬位，已站在勝利邊緣，細粒馬走位靈活，今仗轉戰急彎的谷草一定更合，仲要抽埋3檔，唔搏勢係假咯。
仲有第四場四班1650米的「紅旗星將」，同樣排好位2檔起步，上仗新勝同程氣勢正盛，騎開的梁家俊停賽，因此換湯美仔，睇嚟佢避過墮馬，真係有後福行好運。