唔好相信一張相，但死咬住一條片。唔好講出軌，用甩轆形容，無咁易被誤會高鐵搞婚外情。
港府，咁講法，真係篤棟到你唔識笑。
唯有睇另一件笑到陳帆標尿的事實，就係山東濱州（咁騎呢的地方在山東北部，渤海西岸。喔，又濱州又勃起，真習帝feel），豎立一座十八米高重六噸的秦始皇銅像，屹立13年，在清明翌日，竟然抵受不住強風吹拂，焚書坑儒的秦皇寄身的銅像，被吹到離地飛起，臉朝下重重地PK，龍顏難逃毀容之劫。網友敢問，莫非此乃天意？老秦統一天下，以為千秋萬代，但帝位未穩已經被上帝感召，再難永續。歷史是迴轉的壽司，秦皇銅像轉到今日窮得只剩錢的一帝專政時代，不是被地產商推倒而是大自然力量的「隨機性」，光天化日，當頭一擊！有錢使得鬼推磨，物極必反，暴政的宿命，crossover濱州事變，這一堂突如其來的歷史課，愈睇愈惹笑。渤海西岸，名字像極了香港樓盤，奉旨掃貨的聖公會隨時中招，以為係純官和四叔的旗艦作。本地擁帝派醒少少，千祈咪亂射啊。秦皇歸秦皇，習帝歸習帝，懂麼？