五大聯賽第一隊冠軍出現喇！拜仁慕尼黑上個禮拜六喺德甲就算收起羅拔利雲度夫斯基、湯馬士梅拿同埋列貝利呢班主力，作客照贏奧格斯堡4:1，提前五輪宣佈六連霸，成班球員賽後捧住隻假嘅沙律碟慶祝，當提早捧盃之餘，亦都為禮拜三歐聯八強次回合主場鬥西維爾打支強心針。
五大聯賽雖然就話一早有曼城、巴黎聖日耳門呢啲球隊放出，不過最早加冕都係德甲霸主拜仁。佢哋喺上周六聯賽作客奧格斯堡，都有為咗禮拜三歐聯留力，前鋒辛度華拿代替咗羅拔利雲度夫斯基，洛賓同占士洛迪古斯都取代梅拿及列貝利等。同上禮拜八強首回合作客西維爾相比，只得門將烏里治、謝路美保定、祖安巴尼特同埋甘美治四人繼續擔正。
反勝奧堡4:1
拜仁先喺18分鐘有中堅歷卡斯蘇尼擺烏龍落後，不過32分鐘已經由哥倫天杜利素接應甘美治右路傳中頂入追平，38分鐘洛賓右路突破傳地波入中間，祖安巴尼特後腳想轉身，反而益咗占士洛迪古斯喺遠柱輕鬆射地波成2:1，反超前返更衣室。
下半場62分鐘洛賓混戰狂抽射入，加埋辛度華拿完場前頂入，帶領球隊贏4:1，提早五輪封王，搞掂六連霸大業。由於德甲一定係最後一輪先頒獎，所以拜仁成班球員賽後就衝晒出黎，拎住隻一早預備好嘅自製沙律碟慶祝，直情當真嘅一樣。
列貝利八奪德甲
雖然大家都當拜仁捧盃係食生菜，不過舊年10月回巢嘅老帥希歷基斯就話：「我接手時落後多蒙特五分，所以當時管理層冇叫我一定要捧盃，我亦都估唔到咁順利，甚至其實我本身冇諗過會再教拜仁，只係當時球會搵唔到其他教練，我認為呢個冠軍，前教練安察洛堤都好有功勞。」上禮拜六35歲生日嘅列貝利，亦都係第八次贏德甲，同拿姆、簡尼等拜仁名宿並列最多。