讀中學時，聽歷史科老師講晚清歷史，話到清政府屢屢遭受列強壓迫，簽訂不平等條約時，時常感嘆！「弱國無外交，你地要記住！」當年私立中學嘅老師，大部份係大陸逃港難民，大學資歷不被教育署承認，教書時小不免有一份冤屈感，講到文史哲，會講到咬牙切齒，不經不覺之中，向我地呢班學生注入民族感情，我地班人大個之後，多數成為大中華膠。香港回歸中國後，號稱忠心為國嘅愛國商人董建華做咗特首，竟然任由教育局廢除／消除／忽視中史科，於是1997年出世，今年21歲之大學生絕大部份缺乏中國認同感，累得林鄭月娥呢位「奴化教育精英代表」幾乎日日將培育青年掛在口唇邊，驚死香港青年唔愛國，佢嘅Patron董建華都算累得佢慘咯！
今天中國在國際舞台騷肌肉，銀彈掛帥，似有用之不盡嘅資金在全世界買公司買地產買足球會，真係強國有外交之典型。反之，當年之大英帝國就如日落西山，窮不能興，變成弱國無外交樣辦。今年1月31日，英國外交部宣佈出售英國在全球大使館中，最耀眼值錢嘅物業──英國駐曼谷大使館，售價4億2千萬英鎊，買家係香港置地集團（英資）與泰國中央集團（Central）。英國係日不落帝國之時，1922年在曼谷市近郊之Wireless Road買入3.5公頃土地（當年市中心在大皇宮，法政大學一帶），興建英國大使館，有花園平房，大使住宅，花園內有維多利亞女皇宮，甚有威勢，之後呢一區成為外國使館雲集地段，美國大使館亦在鄰近。
英國政府入不敷支，連年削減預算，外交部每年預算由2012年之21億英鎊削至2017年12億英鎊，但仍然為咗門面，在全世界一百六十幾個國家地區維持使館，駐外人員邊度有錢使吖。曼谷大使館連年失修，維修費都冇着落，於是再三檢討之後，外交大臣約翰遜拍板出售曼谷大使館，得款4億2千萬鎊，夠全球30-40個大使館嘅翻新工程費用，包括裝修最重要嘅華盛頓大使館及為巴黎大使館重鋪電線網絡。2019年英國駐曼谷大使館會搬去AIA Sathorn Tower，簽了15年租約。3.5公頃精華市中心地皮，即等於泰國之21.875 rai，等於3萬5千平方米約376600平方呎，英國大使館以呎價1115鎊出售，創泰國歷史上最高價土地交易紀錄，將來一定係興建甲級商廈、酒店、獨立洋房及高層豪宅，香港置地公司係蘇格蘭股東（怡和）控制嘅，都算肯捨銀為國嘅嘞！