51歲老牌騎師巫斯義又嚟香港，佢老人家周日（8日）將喺沙田馬場第八場二級賽主席錦標，策騎「壯思飛」上陣。
講起「壯思飛」，呢匹馬嘅命途真係幾坎坷，先喺分級賽成日只得二、三名等，跑極都係得個近字。
之後，喺17年出戰女皇銀禧紀念盃（一級賽1400米）後，發現右後腿脛骨末端應力性骨裂。唉，足球員俾人飛剷斷腳，都好大機會跌實力，更可況要用對腳講求速度嘅馬呢！
結果，「壯思飛」唞咗足足超過8個月復出，可惜全部差啲包尾返嚟咁濟，鬼叫呢匹馬喺17年12月又傷過內側小掌骨非移位性骨折，冇幾耐就由大摩轉馬房去谷草王方嘉柏到。
不過，上場「壯思飛」竟然喺一場一班1600米，跑到唔錯嘅第三。哈利路亞！唔通係神績降臨？
結果，方嘉柏即時報咗呢場二級賽主席錦標，仲話「壯思飛」贏唔到都好，只要跑得近，都會幫呢匹馬喺五月買機票，飛去新加坡跑克蘭芝一哩。
如果最後真係喺新加坡揚威，仲唔係活活生生嘅生命鬥士！