網上嘅騙案真係可以層出不窮，有晒相都未必真係當事人經營，肥媽瑪利亞（Maria Cordero）就係最新嘅受害者…
喺facebook上面就有個名為「肥媽私伙菜」嘅專頁，估計只係運作咗未夠一星期，但就貼咗好多肥媽嘅相，包括佢上節目、去街市買嘢同煮餸、出席活動嘅相，但同時呢個專頁又推銷好多廚具，仲話係韓國進口，聲稱係「肥媽fans團」開團購。
肥媽昨日喺facebook都有澄清，呢個「肥媽私伙菜」專頁同佢無關，係盜用咗佢嘅相去宣傳，保留追究權利，昨日肥媽回應傳媒查詢時都話莫名其妙：「我好想向大家呼籲，我係肥媽，有個網站叫肥媽私房菜又賣刀又介紹人買魚蛋買嘢，同埋好多佢啲相係我Instagram、facebook，download我啲相，我唔識佢哋，亦唔知佢哋係邊個。啲嘢唔係我賣嘅，我冇用過。」肥媽話已經通知咗facebook，啱啱去咗跑馬地警署報警備案。
唔只「被代言」廚具，肥媽仲話知道有一班人自稱贊助佢玉器，呢班人借住肥媽嘅名嚟兜售玉器，肥媽話：「其實我係有一個馬來西亞玉石公司sponsor，而唔係一間自稱贊助我嘅香港公司。」