曾效力英超紐卡素嘅法國翼鋒賓艾化，上月七號已經31歲生日，不過佢喺禮拜五先喺ig鋪張單人切蛋糕相，點解呢？原來佢自從上年四月六號幫巴黎聖日耳門（PSG）4:0大勝艾夫蘭治斯嘅法國足總盃賽事上陣之後，到𠵱家都未上場踢過波，所以賓艾化為咗紀念自己虛度一年光陰而自嘲「生日快樂，坐足一年」，唔少球迷都鼓勵佢快啲轉會踢番波呀！