政府經常批評議員喺財委會拉布，但官員喺回應議員提問時，有時表現不忍卒睹，噚日仲辣㷫咗財委會主席陳健波。
立法會財委會噚日討論環保署開設一個月薪16至18萬元嘅助理署長常額職位，推動減廢、回收工作，議員就問政府開咗呢個位後，政府有咩回收工作指標，值得立法會批出撥款先？
糾纏咗一粒鐘，政府答唔出，全程帶議員遊花園，不斷重複現有工作，陳健波都頂唔順，力斥政府回應議員提問時，全無準備，講唔出攞錢開位有咩好處，話官員難向社會交代：「政府答案係非常之差，好多議員都問緊，有咩成效指標？究竟你呢個新位，同舊時有咩分別？有咩新嘅宏願？但你一路都講唔到，如果你繼續係咁，好難怪議員不斷問你。」
陳健波講明，會向政府投訴：「如果官員繼續係咁答嘢，真係好令人失望。」但佢話唔能夠無了期畀議員問落去，但支持議員繼續透過書面追問政府。工黨張超雄大讚陳健波，話好難得佢講咗句公道話。