【《蘋果》專訪】現年37歲、前英皇小花何嘉莉90年代曾活躍娛樂圈，02年突然退出幕前，轉戰幕後做藝人形象顧問，06年嫁首任丈夫、甜品大王黃逸璋，兩人育有一子，14年宣佈結束9年婚姻，翌年底低調跟飛機師Gerald Sze再婚，去年誕下囡囡。何嘉莉今年重返英皇娘家，簽約做KOL。
何嘉莉日前在銅鑼灣接受本報專訪，講起退出幕前16年後「復出」做KOL：「我唔可以停低落嚟，我鍾意做嘢。我當年的確係唔想做（做藝人），好大壓力，冇自由，我本身好鍾意自由，好想試唔同嘅嘢。」
仔女需要我
轉戰幕後，何嘉莉修讀fine art增值，同時結婚生仔，兩段婚姻，先後生了一對可愛子女。她堅持家庭為重：「仔女仲細，佢哋需要我去照顧，唔可以掉低佢哋，拍劇太困身，會錯過好多嘢，暫時KOL呢個方向幾啱自己。」
何嘉莉早前獲邀在無綫節目《流行經典50年》開金口唱出《兩種人》，她笑言大過歌癮：「我好鍾意唱歌，嗰次演出好大壓力，要顧住唔甩歌詞、唔發台瘟、唔走音，表現又要好，樣又要靚，做歌手壓力大。」
愛用細手袋
問何嘉莉現實生活可是「虎媽」？她答：「一睇我就知唔係，我係好hea嘅，我唔會叫子女做，叫佢哋做咪即係叫我自己做。」何嘉莉平日打扮潮爆，帶子女出街有貼士，自爆貪靚的她要帶細手袋，所以不准囝囝帶玩具，即使湊細女都會計好幾餐奶粉，一切從簡。她否認天生購物狂，一半家用會用作家人健康飲食，20%子女學習，10%儲錢，剩下20%置裝扮靚。
採訪：楊定
攝影：陳俊強
髮型：Matt Chiu @ Xenter
服裝、場地提供：連卡佛
