呢幾日寫曼谷遊，估唔到馬主F與朋友T有反應。馬主F講，曼谷算係香港人後花園，所以復活節期間佢攜同一家大細去咗曼谷，遇到大量香港人，廣東話到處聞。問馬主F，住在那一間五星級酒店？馬主F話以往多數住在文華東方，但經歷過無數次交通擠塞，浪費大量時間之後，今次決定入住高架鐵路車站旁邊嘅酒店，今勻就入住Terminal 21嘅Grande Centre Point，搭BTS（高架鐵路）非常方便，去周圍沿線之酒店、商場、餐廳，一次都唔使搭的士，遊曼谷未試過咁爽！所以呢，佢叫我下一次都係住BTS旁嘅酒店好嘞，例如Terminal 21呢個站就有Grande Centre Point、Sheraton、Westin三間酒店鼎立，好過去文華東方啦！係就係嘅，之不過曼谷BTS在1997年興建之時，公司莫財，又遇上金融風暴，所有車站都缺乏電梯上落，現在要老人家及行動不便人士（遑論傷殘人士）點樣可以上落三四十級樓梯上落BTS車站呢？與家中長者去曼谷，住在BTS旁邊嘅酒店都係賺得望車站興嘆！
不過馬主F點出一樣嘢，香港人老早就從地鐵帶動樓價呢方面學到。朋友T對左丁山講：「你在專欄講曼谷豪宅，我三年前已付諸行動，吸取香港經驗，只買BTS路線車站鄰近嘅住宅單位，我買咗兩個直情在車站隔籬，雖然離開市中心遠少少，唔係四面佛左右咁巴閉地段，但去到今年已升值兩成，算係咁嘞！」故此呢，近期在香港推出的曼谷新樓盤，全部以鄰近BTS為標榜，以曼谷市中心位近BTS車站物業，更係精華物業所在。
不過泰國賓架B就警告，左丁山唔好講得太好。佢話曼谷四季私人住宅項目有上海平安銀行融資3億7千5百萬元，主因是泰國本土銀行認為樓價升得高，有風險，對地產貸款改持保守態度，唔敢去得盡，於是泰國地產公司惟有向境外銀行借錢（呢樣嘢左丁山有經驗，1981年時，去泰國做過地產貸款，幾乎領咗嘢），歐美銀行邊度敢借呀，於是中資銀行乘機入佔市場。此外，泰國地產商亦搵埋外資合作買地起樓，2013年時曼谷有四個泰外合資地產項目，到2017年已增加至42個之多，最矚目嘅當然係英國政府捱窮要變賣祖宗家產，將位於曼谷中心旺區嘅英國大使館賣畀香港置地與泰國Central Pattana嘅合資公司，作價只係4億2千萬英鎊而已！