姚本輝馬房「好性格」已跌至18分，在21分淘汰線以下，質素當然不高，但此駒只5歲，過去又識贏，如果就咁出局，實在有點可惜。所以「好性格」嚟緊周日（8日）出戰沙田第二場五班1800米泥地賽，姚本輝顯得好緊張，似乎好大決心救亡。
話說今朝（5日）姚本輝一早已同蔡明紹在機坪一邊咬耳仔，一邊等助手替「好性格」踱步熱完身，紹仔就接替上馬，往大圈快跳兩段，末段更刻意磨煉後勁，造22.8秒高速，以低班長途馬嚟講，交出咁快時間，可見牠狀態甚佳。而操完姚本輝已企定定在機坪等接馬，紹仔落馬後向輝哥匯報「好性格」情況，兩人傾咗好耐先散水，有晒搏殺手影。
「好性格」整體上名率不高，但跑同程泥地1800米卻甚可靠，5戰獲1冠1季，第五及第六名亦各1次，難得遇上合適賽程，又抽到5檔，唔通真係唔搏等淘汰咩？