隔牆有片：
勇武八警圍衝燈阿伯 - 李八方

警方不時拍宣傳片想建立警察正面形象，但有時真係唔係咁易。好似網上近日流傳一段影片，影到8名警員喺油麻地街頭圍住一名老伯查問，惹來不少途人圍觀，仲俾網民影到一名女警以手遮拍攝者鏡頭，叫拍攝市民「唔關事唔該行開，唔好阻住我哋」，結果條片惹來網民議論紛紛。
拍攝者本周二將影片上載「旺角人旺角事 MKpeople」fb專頁，片段一開始，見到一名警員向被指不依燈號過馬路嘅老伯講：「大家好聲好氣箒，點解咁勞氣箒？」老伯即大聲講出身份證號碼，又話畀咗身份證警員，唔明為乜話佢唔合作，此時另一警員就大喝阿伯：「（講嘢）細聲啲啦！」

女警手擋拍攝者

另一名女警一邊叫拍攝者唔好阻礙差人做嘢，一邊出手阻鏡頭，「你係咪關事㗎，唔關事唔該行開，唔好阻住我哋。」拍攝者事後係fb話，事件起因係兩名警員用兇悍態度查老伯身份證，老伯不甘示弱同樣大聲回覆，隨後警員要求增援，更一度多達9名警員在場，拍攝者反問：「有時間就去捉南生圍放火狂徒啦，浪費警力做埋晒啲欺凌弱小嘅事。」
警方發言人話，本周二下午油麻地分區人員在碧街與上海街交界，發現一名男子不依燈號過馬路，警員上前調查，其間該男子一度表現不合作，警員票控該男子後離開。