信不信由你，《以你的名字呼喚我》的解藥終於運到了，電影節這劑來自羅馬尼亞的《春光乍洩新寫實基情篇》縱使拍得眼低手又低，卻勉強可算苦口良藥，被意大利甜醬搞到陽痿的非少女們含笑飲砒霜，昂起頭一鼓作氣悉數吞下，幾乎當堂重振雄風。兩個男主角都與中產同志熱烈追求的高富帥風馬牛不相及，人又老錢又冇，瘦的一個根本無身可健，四十開外的軀殼看起來至少半百，寒寒哋背，禿禿哋頭，肥的一個肚腩大過代表你的心的月亮，自認陽具細到溝唔到女，提供服務攤大手板收費，完事後鼻鼾之響，隔籬村都聽得到。天真的你，以為基佬不是似艾米漢默就是似張國榮，天天穿套新款時裝優雅地飲杯「甜茶」食個桃？哈哈哈，請來領教殘酷的現實。
咪睇小呢兩位仁兄周身唔聚財，完全缺乏手執彩虹旗爭取平權意識，他們有新派開明同志最讚許的大愛包容特質，本來計劃召妓，可是嫌雞價太貴，坐慣監的肥豬豬於是提議兩支公閂埋門拍硬檔搞掂，「做得唔怕認，我晌裏頭X過男人㗎，呢啲嘢有乜所謂唧，插咗入去，鬼理得係前門定係屎忽」，其坦白直接，連平日在粗口爛舌中如魚得水的老油條都有啲頂佢唔順。不久之後又修正：「其實通常畀人插嗰個係我，鬼叫我碌嘢最細咩。」憑性器官尺碼決定邊個做零仔邊個做壹仔的規矩，令我大開眼界，可惜導演沒有拍攝黑色喜劇版《監獄風雲》意圖，白白浪費好材料。和《以你的名字呼喚我》那對戲水鴛鴦一樣，他們也莫名其妙撻着，也逼於環境而分手，如果拍續集，應該更加精彩。