立法會《廣深港高鐵（一地兩檢）條例草案》委員會正就一地兩檢諮詢公眾，其中作為香港六大宗教團體之一嘅孔教學院，都有提交意見書，力撐一地兩檢。意見書話，孔子提倡六藝，其中「御」就指交通，由於一地兩檢有利交通交流，所以應該支持，咁都可以將孔子同一地兩檢拉上關係，八方都真係不得不寫個服字喇。
孔教學院嘅意見書入面，提出嘅頭幾個論點都係啲老土嘢，好似一地兩檢合乎《基本法》法理基礎、便利交通等等。但去到意見第4點，佢哋就連孔子都搬埋出嚟，話2,500年前孔子周遊列國傳播儒家思想，更提倡六藝「禮、樂、射、御、書、數」，當中「御」正係指交通，而一地兩檢有利交通交流，一定要支持。連孔子都搬埋出嚟，都係想講「孔子學院支持一地兩檢」啫。