每逢3月都係香港藝術月，就連特首林鄭月娥都要趁墟喺fb帖文，話香港充滿藝術氣氛，而佢自己都參觀咗兩個私人展覽。不過，網民當然唔會咁易放過佢喇，不論藍絲黃絲都留言炮轟，有藍絲就要求林鄭「立23條和辱警罪」，亦有人要求林鄭盡快處理南生圍火災，真正回應藝術嘅只係寥寥無幾。
娥特噚晚po出佢身穿黑絲現身禮賓府籌款活動、以及佢為Art Basel剪綵嘅相片，不過網民似乎就唔太受落，仲有人就留言話「又做埋晒啲無聊事」。有部份留言，更索性直接表達意見，好似有人就反映對南生圍大火意見：「南生圍再三被人惡意縱火破壞，真是太離譜、影響生態環境。」當然亦都有人為被左派攻擊嘅戴耀廷申冤，大鬧「特區政府在特首帶領下，打出迫害知識分子的第一槍！」等。至於娥特睇咗咩展覽，似乎真係冇乜人想知囉。