身兼全國政協副主席嘅前特首董建華早前因為成立網媒《香港頭條》，惹來全國政協常委何柱國及其旗下傳媒炮轟，之後悄悄地改名《點知天下》，最近更推出電話App。
有位列國家領導人級別嘅老董支持，網媒內容點都有番咁上下啩？八方急不及待下載嚟睇睇，睇完都覺得目不暇給，似乎老董都深明刻下新聞嘅吸睛大法。例如喺「推薦」一欄，有條新聞叫〈男子強姦後求和解 將自己姐妹送對方家人強姦〉，「港聞」則有新聞係〈真服了鄧紫棋，穿短裙獻唱腿岔超開，網友：能塞下一個籃球！〉，「大灣區」欄目就有〈再紅紅不過劉德華！20年前劉德華片場的一個舉動，注定成老大〉。唔少新聞都係取材大陸網站，取材都幾踩界，唔知係咪想開創新風格？有份科水嘅人又支唔支持咁破格？