未去曼谷之前，有朋友睇到香港報紙有不少曼谷樓盤廣告，每個廣告都聲稱新樓盤所在地，交通方便，鄰近高空鐵路或地鐵站，朋友們半信半疑，叫左丁山到咗曼谷，如有空就去睇吓實況。
喂，去曼谷放假hea幾日噃，點解要撥出時間去睇樓，左丁山梗係唔應承實，只肯話隨機睇到就睇，特登去睇樓就唔一定嘞。住在Anantara酒店，隔不遠就有新樓出售，叫做Magnolias，在君悅酒店之前，君悅酒店再行前幾步就係四面佛，呢間大廈樓高60層，有316個住宅單位，一房單位售價由970萬銖（約130萬港元）起，講位置就一流，呎價中位數係每平方米22萬9千銖（伸算約每呎5320港元），若在香港一定係超級筍盤，因為BTS車站就在St. Regis對面，距離呢個樓盤大概係三分鐘腳程。左丁山行經門口，見到廣告牌，歡迎內進參觀，真係想走入去睇吓，但畀老婆扯住走：「喂，去Chidlom Central呀」，唯有作罷。
次日看報，The Nation（曼谷民族報）有一個曼谷地產特刊，講到曼谷地產前景篇，一片好景，不少豪宅樓盤在市中心區Silom，其中一個叫做Lofts Silom一推出就賣出八成咁講，不知是否廣告推銷之辭還是真實地產新聞報導。
晚上與幾十年前讀書時嘅屋主一家到吞武里河邊嘅半島酒店吃晚飯，屋主居住於吞武里近70年，今年91歲，丈夫前年過身後，鎮日留在家中不願出外，點知我地登門拜訪，佢立即認得，與左太來一個擁抱，仲肯應承出外吃飯㖭；為免過湄南河塞車，去半島酒店就比較容易，可惜左太以為請人地食中國菜，居然點咗一味北京填鴨，哎，都不是那一回事，之不過，屋主及兩女一子平時甚少吃中國菜（佢地係純泰國人），照樣話very good！半島酒店花園就在河邊，望到不少高樓大廈，其中一間就係Four Seasons Private Residences，位於湄南河邊，坐艇過河就可到文華東方酒店與香格里拉酒店，當然亦會有艇到鄰近之BTS車站。售價如何呢？屋主嘅公子係機械工程師，佢話：「一定好貴，我地買唔起。」其實佢住在St. Regis後面嘅豪宅，不過係10幾年前買嘅，以今天價錢，確係未必計得掂數。豪宅呎價（曼谷計每平方米價）總係上升得快過薪水嘅，全世界都如是。