香港人乜都爭一餐，大減價爭住買，新股爭住抽，連搭港鐵出閘都爭先恐後！網民Chan Tsz Kin本月1日晚喺「香港突發事故報料區」fb群組上載短片，話喺調景嶺站有兩男因「出閘爭位」打交，形容兩條友係「ROUND 1 FIGHT……TKO（將軍澳）街霸」，但只影到前傳，冇round 2冇結局。
掃腳唔高又唔準
其中較年輕嘅四眼哥哥，打交嗰陣似足經典格鬥遊戲《街霸》啲角色，對住中年光頭佬un吓un吓。網民話四眼仔亂晒陣腳，「阿叔爆氣除口罩，白衫（四眼仔）腳震震仲未chok到技」，「唔係跳吓跳吓就變李小龍㗎」，仲笑佢係咪同阿叔「跳緊cha cha？」
有玩開格鬥遊戲同對武術有認識嘅朋友同八方講，四眼仔似有跆拳道底，只係佢啲血（體力）唔夠光頭阿叔咁多，加上掃腳唔高、勾唔準，所以當推手加掃腳都做唔低阿叔，就主力防守，「如果俾光頭叔叔埋身……應該玩完」。
港鐵發言人證實當晚有兩名男子出閘後有爭執，車務控制中心最終報警求助。警方發言人回應當晚收到港鐵職員報案，證實29歲姓方男子同49歲姓容男子因身體碰撞問題爭執，涉嫌喺公眾地方打交，被帶返差館，由將軍澳警區刑事調查隊第4隊跟進。
識睇睇留言
Medius Augustus：有可能跟人學過幾堂山寨泰拳，kickboxing之類，不過就初級到痹冇乜姿勢全冇實際嗰隻囉。
Otto Lam：爭出閘，無聊到極限，有時間打架，代表大家不是趕時間。
資料來源：《蘋果》網站