意大利籍騎師李寶利非常硬淨，上月23日試閘墮馬搞到右邊鎖骨骨折做手術，話咁快本周二(3日)已可復操，馬會亦已正式公佈，指李寶利現已無恙，獲准於周日(8日)沙田賽事上陣。
李寶利亦好積極為復出做準備，周二操完馬去中環接受冷凍療程，整個人進入一部大機器內，入面攝氏零下95度，以降低皮膚及軟組織的壓力，舒緩疼痛及緩解肌肉緊張。到了今早（4日）李寶利亦繼續有露面，和練馬師蘇偉賢在烽火台密斟，研究未來搏殺大計外，又獨操姚本輝馬房「香港飛輪」，在泥地大跑道單跳一段，人馬俱十分輕鬆，狀態毋須懷疑。
「香港飛輪」周日將作服役首戰，列陣四班1000米直路賽，李寶利今朝隻隻唔試，係只試呢隻，可見他心中有馬，其實李寶利非常重視這匹3歲不明物體，馬兒來港後5課大閘俱由他經手，擺咗成擔心機上去，課課都有不俗走勢。而姚本輝綽號「馬王輝」，不時獨具慧眼引入優質新馬一出即勝，這次李寶利這麼心急復出，不排除就是為了「香港飛輪」，不想落入他人之手。