行政長官及政治委任官員離職後工作諮詢委員會早前批咗前律政司長袁國強及前商經局長蘇錦樑，各自喺法律界重操故業，本身係律師嘅Greg蘇前日開始重返自己嘅律師樓任顧問。Greg蘇喺97年創辦自己嘅律師事務所，轉任局長後事務所改名蘇龍律師事務所。
可能太多人搵Greg蘇問候，所以佢主動獻身，噚日喺fb貼咗新卡片（圖），註明「新鮮出爐的」，「很多朋友都問及小弟的新通訊地址及電話，這是剛剛印好的名片。期望以後能與各位多多聯繫，並請大家不吝賜教。」其實佢啱啱加入曾班子做副局長時曾爆出「騷卡片」風波，事過境遷，離開熱廚房後名正言順騷卡片。
委員會同時批准Greg蘇擔任英傑華人壽保險公司獨立非執董，Greg蘇都喺fb貼出同英傑華人壽保險有限公司行政總裁嘅合照。