赤鱲角機場輪椅唔夠，應該唔係輪椅問題，訂造輪椅容乜易喎，訂多幾百張，機管局話咁易啦。但最困難問題係唔夠人推輪椅，現時機場輪椅服務係外判制，外判公司請到嘅全職員工及兼職散工，八九成都係阿嬸阿叔，絕少五十歲以下嘅人士。聽一位推輪椅阿嬸講，薪水係最低工資，大概外判公司預咗佢地有人客畀貼士，故此人工唔夠多，由坐輪椅人士補足！講到呢樣，全世界以日本最文明，日本人服務絕不收小費、貼士，簡直服務文明之最高峯，令世人尊敬。
香港現時失業率低至2.9%，達全民就業水平，失業人士如繼續失業，必有內在原因，正常健康年青人如果話自己失業，就全無可信理由，只係高不成，低不就，唔想做而已。機場輪椅唔係小問題㗎，香港人口老化，坐輪椅者日增，機場咁大，長者幾難由落機行到去入境櫃枱，跟住行去的士站或巴士站，將來旅行人士對輪椅之需求有增無減，但偏偏推輪椅嘅服務員有減無增（因為推輪椅者亦幾乎老到近長者級）。香港人就話忍忍忍啫，外國遊客來到香港，第一個印象就係坐輪椅難，你話對香港形象幾唔好呢。
泰國機場就大把人推輪椅噃，而且大部份係二十幾至四十零嘅男人，與香港情況完全不同。唔通泰國失業率高，男人都要到機場推輪椅？又唔係噃，左丁山在曼谷看到「世界日報」有一段報道：國家統計局3月23日有報告，2018年2月國內失業人數達49萬1000人，失業率為1.3%，適齡工作人口計3842萬，就業人口3760萬。從上述統計數字可見，泰國已達全民就業，且超乎世界標準，但以左丁山所見，百貨公司、超市、餐廳、機場等等，常見人手充足，唔似得香港平民酒樓要食客自己攞茶壺，為何香港與泰國同是充份就業地區，但竟有如此分別？要研究人員調查清楚。
泰國人人有工做，以泰人之溫馴性格，有得溫飽就懶理軍人政府嚴控言論議會選舉，故此英文報紙大字標題講巴育總理拖延選舉，普通人懶得理會。左丁山之識字朋友（醫生、工程師、大學講師）亦都唔提，大家只講生活及塞車困境之事，於是左丁山提起亞洲五十間最好的餐廳前十名之中，東京佔四家，曼谷三家，即Gaggan（第一），Suhring（第四）及Nahm（第十），恭喜佢地，點知朋友話一間都未聽過，指係外國人嘅玩意，畀遊客去嘅啫！