巴士車長成日都遇躁客辱罵甚至襲擊，但唔少乘客其實都體諒車長，甚至送上小禮物打氣。男車長「Wong Ming」上周六喺「巴士的事討論區」fb群組，上載男乘客送上汽水嘅片段，話呢班車雖因車務調動遲咗10分鐘開，但呢名男乘客喺第一分站上車時不但冇怪責同抱怨，落車時仲送上汽水打氣，車長梗係暖在心頭。
呢名車長仲話呀，佢哋辛苦做嘢但大多數得唔到乘客嘅認同，反而被乘客「玩落車鐘」、被鬧，司機早習以為常，有幸遇上咁明白事理嘅乘客，真係由心笑咗出來。佢喺帖文話代表所有客運司機同從業員感謝該名乘客。
暖男獲唔少網民激讚，但有網民質疑九巴安排演員做公關騷，亦有網民話呢幕好有hehe feel。車長就留言回應話，對方可能有宗教信仰，坦言「我駕駛11年，從未見過咁有心嘅乘客」。
識睇睇留言
Ken Onr：真假不重要！只要大家尊重，世界變更美好！
Tom Lee：其實上到車笑住講句「唔該師兄」相信比起物質上嘅禮物更sweet！
Chun Shing Oliver：只是公營大機構另類公關神秘人手法？
Kwok Cheung：怕咗你，驚出事，又飛車，一罐汽水值幾錢。
Tony Cheng：男生拿勇氣對心儀司機告白。
陸永添：做大戲。
資料來源：《蘋果》網頁