周二的亞冠盃G組賽事，FC廣州（廣州恒大）作客泰國武里南聯，在出發前因為武里南機場關閉，所以到周一深夜才到埗。看來對這支兩屆亞冠盃冠軍有影響，在補時階段被對手追成1:1，出線16強仍拖住。
機場關閉玩謝恒大
恒大本來如意算盤是周一在廣州，坐私人飛機直飛武里南，但因機場關閉，行程變成飛去曼谷，再轉飛逸府，然後再轉大巴去到武里南府。本來約兩小時的行程，變成14小時長征。
雖然如此，恒大都繼續派出大批主力，其中馮瀟霆、李學鵬、黃博文及于漢超等上周都有份踢中國盃。而恒大一開賽都佔盡優勢，終到15分鐘，靠鄭龍禁區頂起腳，省中對方後衞入網，射成1:0。
下半場恒大依舊攻勢不停，先有鄭龍單刀被施華拉撲出底線，之後再有高拉特扭過門將射空門，但武里南後防及時回防鏟走，埋下和波伏線。最終補時階段，武里南後場一個長傳，前鋒迪奧高禁區頂控定橫傳，中場柳俊秀後上射門得手，追成1:1，最後亦以此比數完場。和波之後，恒大得九分，只領先同樣贏波的大阪櫻花一分，能否出線，仍要看最後一場的勝負。
文：亨少