示威時經常擔當「男主角」嘅「收工男」傅振中，噚日同一班自稱網民現身港大要求「快炒」戴耀廷，其間卻轉做「幕後」，全程無埋位「開工」示威，只喺旁邊指指點點，除咗指揮示威人士點企、點派新聞稿，就連嗌口號都有得教，叫示威者：「你等陣可以嗌大聲啲！或者可以嗌實一啲把聲！」唔睇以為佢轉咗行做導演。傅振中其後更連攝影師都撈埋，喺示威者受訪時混喺記者群中，舉起手機記錄過程。
講唔出聲討邊五獨
問到點解唔參與示威？傅振中解釋：「咁多網民想表達意見，所以畀佢哋做」，指「愛港力」、「沉默之聲」等團體已經靜晒，但仍有網民想表達意見，所以佢到場幫手，「唔使成日都係我講吖嘛」。
可惜傅振中悉心指導下，呢班「演員」接受訪問時仍頻頻「甩轆」，發言人鄭花蘭被問到戴耀廷犯咗邊條《基本法》時一度口窒窒答唔到，另一發言人吳卓榮代答時就話違反咗正文只有160條嘅《基本法》「第200條」，更連佢哋聲討嘅「五獨」包括邊五獨都講唔出，但就為大家嘅枯燥生活帶嚟唔少joke。
李八方