近年在《愛·回家》系列飾演KC一角，非常抵死生鬼的無綫56歲男藝員歐瑞偉，這天（2日）在沙田馬場現身，不過就唔見佢嘅「另一半」Terry李偉健。
歐瑞偉唔止KC一角深入民心，《城寨英雄》之殺手楊竹鑾、《同盟》的易先生大家亦好有印象，不過歐瑞偉始終最愛《愛·回家》系列，今日佢一身KC打扮上身，偕太太李愛玲及19歲女兒Nicole以馬場稀客姿態，現身為友人梁浩然律師的團體馬「奔馳寶馬」打氣。
「奔馳寶馬」跑第六場四班1600米，是14倍冷門，在騎師梁家俊胯下努力競跑，KC一家三口睇得好肉緊，可惜「奔馳寶馬」直路衝刺平平只得第九名，歐瑞偉冇得拉頭馬。
歐瑞偉女兒Nicole顏值唔差，但歐瑞偉講過阿女年紀尚輕，本身雖有表演慾，但都要完成大學課程，才會考慮是否投身娛樂圈。
「奔馳寶馬」上仗跑第二，今仗補中失敗，而梁浩然養在澳洲的賽駒「哈霖」（Harlem），上月10日在澳洲費明頓馬場一級賽2000米澳洲盃，配騎師韋米高爆50倍大冷Win，頭馬獎金約554萬港元，令馬主名利雙收。