每年愚人節網絡都有唔少流料，幾多真幾多假有時好難分，尤其一班經常要「快人一步理想達到」嘅網民，隨時唔小心分享咗流料，刪post都刪唔切。以下幾個關於體壇嘅整蠱資訊，你又有冇分享出去？
高麗航空推出香港直航平壤航班
(中招度****)
點解有人信﹕港足剛作客北韓，有40多球迷隨隊，加上金正恩同時間私會習近平，令人有這聯想不出奇。
香港曼聯官方球迷會開設二萬呎會所
(中招度***)
點解有人信：呢個話有神秘會員出資4100萬，喺工廠區開設兩層式睇波會所，仲話邀請義工幹事變成受薪員工嘅post，咁啱有喺樂視失業嘅紅魔死忠馮堅成，留言「好嘢，我有新工返」。
鐳射眼執法今屆俄羅斯世盃
(中招度**)
點解有人信：英國太陽報報道，指今屆世盃球證會配載VAR眼鏡執法，等佢哋可以即時睇重播。不過見呢款價值5萬蚊嘅VAR，戴咗後成個X-MAN嘅鐳射眼咁，唔好話執法啦，連行路唔撞人都難啦。相信係傳媒諗住今年世盃年，近期又好多VAR嘅負面新聞，所以諗住會有人信啩。
拜恩復出加盟騎士
(中招度*)
點解有人信：clutchpoints.com呢單新聞，對於NBA有少少認識嘅都唔會信，基本上一睇就知流到爆炸，情況就好似BBC話黑帝放棄F1轉戰MotoGP一樣，講到冇人信。