係我自己唔衰攞嚟衰，見在澳洲犯風化案的內地藝人生得幾靚仔，一時忍唔到手上網大起底，結果春光無限的照片睇完一張又一張，搞到下午場電影幾乎遲到。既不煲劇又不再微博，高雲翔聽都未聽過，只見相中人英俊得來硬硬淨淨，該地日報抬舉他為中國米路吉遜，性感指數實在較全盛期的鬼佬前輩更高，而且三十五正是最令人流口水的歲數，有心有力有臨床經驗，有市有價可遇不可求，政治意識極度騎呢的我立即想起那句直仔常掛唇邊的「唔滾唔知身體好」，深深為在負面新聞中邂逅俏郎君而惋惜。冇陰功，雖然袋鼠國法庭未開，他祖家的網民已經群起圍剿，香港亦響起疾呼「賤男」的附和聲，唔使審都當他殺無赦的色狼，一向熱衷信奉的黃腳雞陰謀論悉數拋諸腦後。據說有齣由他和范冰冰領銜主演的劇集《巴清傳》，原本排期這兩個月播映，醜聞一出立即遭禁，以人廢戲快過打針，速度不要說區區香港望塵莫及，連以專業見稱的荷里活都瞠乎其後。
盲目追捧男星惡果自嚐，最近就有啼笑皆非的一單。曾在去年亞洲電影節放映的泰國片《沒緣茉莉》迄今未看，但知己知彼朋友傳來男主角玉照，暈晒大浪之際脫口而出「我要去曼谷」，色迷迷不言而喻。皇天不負有心人，該片於剛剛在澳門舉行過的亞洲電影大獎榮獲數項提名，代表團旋風過港，我厚起臉皮動用惡勢力死纏爛打，結果黐到一餐下午茶。嘉賓一行三人姍姍來遲，製片導演怎麼帶了個助手，說好的男一號哪裏去了？定睛細看，媽媽咪呀，綺夢中的粗矮壯，真人高高瘦瘦，幸好沒有魯莽飛到泰國，否則一定告他騙婚。