人在曼谷，不離飲食與shopping，既然所有市內旅遊景點及著名寺廟，多年來已去過不下於五六次，現在已經冇興趣再去，剩落嚟嘅活動不外乎做spa、按摩、食靚嘢及購物嘅啫，左丁山特別揀在3月25日離開馬場之後坐夜機去曼谷，主要係唔想在復活節假期同人迫爆機場及在曼谷到處同遊客爭的士也。
最夜班機去曼谷就係阿聯酋EK385，於是第一次試吓坐空中巴士A380，飛機分兩層，上層九成係商務客位，下層全是經濟艙，商務艙座位又好舒服喎，座椅配備一個「納米bar」，內有Evian、Perrier、汽水、樽裝橙汁等飲品，可以隨時自取，唔駛好似國泰機咁，吓吓要搵空中小姐。阿聯酋呢，空中小姐只會在吃餐時候先至出現，其餘時間多數唔見人，但啲中東口味食物，似乎只啱印度人中東人泰國人多啲，左丁山食唔落，只好唔食。飛機就非常準時開動，點知滑行一分鐘就宣佈：「空中交通繁忙，控制塔要我地遲半小時起飛，」結果就係遲咗40分鐘，赤鱲角機場已運行到最高容量，成為香港空運增長嘅樽頸。
3月29日下午回程，因預估塞車阻時間，十一點就離開酒店，結果去到機場，還有好多時間到阿聯酋之貴賓室飲茶吃東西，貴賓室就夠晒大嘞，坐得舒服，可惜食物少，又唔啱大部份香港人胃口，於是食個Carrot Cake算數。上機嘞，人頭湧湧，似有幾百人在候機室等上呢架A380，亞洲區內短程旅客生意真係唔錯！適值泰國學校已放暑假，有幾個旅行團來港，唔怪得咁墟冚。因為飛機冇嘢好食，上咗機就去見周公，夢醒已到香港。一落機，機艙外推輪椅阿嬸已嗌救命，原來呢班機有十個八個乘客要坐輪椅，但輪椅數目唔夠，要逐個推出外面座椅坐低，再返去機艙外接下一位，然後由掃巴（supervisor）安排邊一位輪椅客先走。乜嘢叫做十個煲四個蓋，在機場一睇就知。香港乜都唔夠，機場容量爆晒燈，真真麻煩，但未曾親眼見過，就唔知道香港機場連輪椅都唔夠也。香港人口老化，銀髮族出外旅遊，迅速增加，機管局都要諗計增加輪椅至得。但輪椅阿嬸大聲講：加輪椅，容乜易吖，冇人去推呀，我地係外判公司員工，長期有幾十個空缺，邊度夠人做嘢啫，人工係最低工資，雞碎咁多，點有人肯做吖！哎吔，唔夠輪椅，原來又係勞工短缺之過！