「你知道嗎？根據研究，古代呼吸過空氣的人，都不在人世了。」若然聽到有人問呢條問題，大家會唔會皺起眉頭，覺得提問者唔知搞乜鬼，竟然煞有介事問起，根本唔使研究都知嘅答案？如果再話畀大家聽，提問嘅竟然係香港天文台，會唔會更加意外？如果大家想鬧天文台呢條問題勁廢，大家睇睇日曆，知道噚日係愚人節就真相大白！
天文台噚日喺facebook專頁上載片段，拋出咗上述問題，發帖指：「你有想過空氣的感受嗎？沒有。因為你只想到你自己。」但見hashtag係「節日特輯」，相信大家都知道呢個係「應節」po，趁愚人節同大家開玩笑，片尾揭示佢哋想藉呢個廢po作呼籲：「如果唔想以後真係無得呼吸，記得要節能減廢」，唔少網民大讚天文台好鬼馬。