飛機疑驚現新鮮出爐點心同燒味！香港航空噚日朝早喺facebook上載咗幾張相，成功洗版兼吸引八方眼球。相中見到空姐推住架餐車，不過唔係問coffee or tea，而係問你食蝦餃定燒賣呀？架點心車冒晒煙咁，名副其實新鮮出爐，喺飛機上空食到熱辣辣出爐點心，真係世界級享受。
除咗點心車之外，港航仲有燒味餐車，有明爐叉燒、大大隻燒鵝，兼有空姐大派懷舊小食，例如飛機欖、珍寶珠。不過，港航嘅空姐們其實係想趁一年一度嘅愚人節，同大家開個玩笑，大家都係ff少陣啦。
其實八方嗰日都獨家獲邀上機，現場睇空姐影呢輯靚相㗎，見證住為咗影相，可以去到幾盡，道具樣樣真材實料，攝製隊為咗營造出煙效果，仲出動埋乾冰㖭，唔怪之得呃到唔少like啦。