上星期在曼谷Anantara酒店，早上準備離開房間去食早餐之際，手機響起，香港電話號碼顯示，乃勤力德來電，於是接聽，若是3字頭，就多數會拒接㗎嘞。勤力德問：「喂，唔見你返工，係唔係病咗呀，好番未呀……」急忙截住：「強哥有心，我唔係病，只係走咗嚟曼谷hea吓啫。」勤力德即刻笑咗出嚟：「哈哈，都係我老婆叻啲，佢估中你係去咗曼谷！」凡係老友都知左丁山有假期就走咗去曼谷，去日本就要計啱時間，同肥仔K一齊去先至過癮，有同伴識講日文，在日本旅行，係另外一種經驗。
剛才講，凡是香港電話，若來電顯示係3字頭，就多數唔聽，但最近撞過兩次板，就係威爾斯親王醫院與香港眼科醫院嘅電話都係3字頭，左丁山唔聽，咁就麻煩，原來醫生有事改時間，通知唔到左丁山，而左丁山矇查查唔知道，按時到醫院撲個空，浪費時間也。
Anantara即是以前曼谷之四季，即是以前之曼谷麗晶，開幕時就叫曼谷半島，改名之後，連曼谷的士司機都唔多識，在街上截的士返酒店，司機話唔「味lu」（唔識）；醒起幾年前在九龍叫的士去「洲際」，司機反問：「邊一間話？」於是講「麗晶」，司機即刻有反應：「哦。」今次在曼谷重施故技，講：「拜攏靚貨試新」（拜，去的意思，攏靚，即酒店，講Four Seasons，司機唔會明，要用泰國式發音），司機立即示意上車。
品牌之值錢，在乎知名度及令人聯想起之高品質或高水平服務，好似酒店The Ritz-Carlton咁，旅客一聽就聯想起五星級高水平服務，同一個集團啫，Marriott萬豪及Westin，Sheraton就會聯想起相當唔錯，未及最高水平；Marriott Courtyard，三星企理酒店；St. Regis，嘩，好貴高檔格調噃。國際旅客上網搵酒店，睇酒店名字已估計到，期望唔會有落差或驚喜嘅嘞。故此酒店業主（多數係本土大公司，富豪，財團）多數將酒店交俾連鎖名牌負責營運，如果要獨立經營建立品牌，要好有持久力兼耐性先至得。Anantara業主送走四季，自己營運，知名度梗係差啲嘅嘞，好彩有麗晶四季打好基礎，總算有啲客源，但左丁山自1985年起住曼谷麗晶，總覺得新不如舊，如果麗晶有10分，四季有8分，依家Anantara得番7分，長此以往，恐怕會流失擁躉咯。