復活假頭一天，深圳口岸人變蛇餅，某報形容香港人湧上深圳旅行。本報記者則指，蛇餅方向不同，是內地湧過來香港的，共650團約三萬內地客。搶飛無望打定輸數的香港人一見三萬同胞，冷了半截，什麼五月天和金盆o浪口，肯定被三萬牛仔牛女搶光光！有這麼悲觀嗎？嗯，令林鄭大叫感動的港珠澳大橋開通埋，香港人只能任黃牛開價，被「劏死牛」！紅館，勿近！
子華哥粉絲心好翳，猛問子華金盆收口之後，會轉行做乜。從神的方位參透，唔，沒理由兩忘煙水裏，至緊要好玩的話，應該參加補選！同樣叫做華，俊華成功示範了，拎like容易過撲飛好多。子華出選，九西與新東，零拉票零落區零樁腳……都會贏開巷！本土焦土再無借口射票落海了吧。建制點鋤子華神？睇晒過去咁多年的棟篤笑，逐句狙擊，由選舉主任頒令，唔信納子華真心擁護基本法。主任利申，以前有捧過場，覺得子華神神化化無句認真，點確認佢過得到西環那一關呢。黃子華被DQ，粉絲鐵定與神同行，幫神發聲，門常開神速被大台佔領，一片黃海就等黃子華金口重開！嘩，諗吓都激動喎。唔使修憲永續，這就是香港的真．黃……帝！