英超周日早場，上輪聯賽三球大炒屈福特嘅阿仙奴延續勇態，主場以3:0大炒史篤城，保住爭四希望！反觀史篤城賽後繼續以27分排喺尾二，護級形勢真係唔樂觀。
賽前阿仙奴領隊雲格確認，門將施治腹股溝受傷今場唔踢得，改由奧斯賓拿守住大門。好在韋舒亞趕及傷癒正選登場，拍住艾利尼扼守中場中路。不過開波四分鐘史篤城就為阿仙奴帶嚟威脅，梳頓沙基利接應隊友傳送左腳推橫施射，奧斯賓拿冇晒反應，可惜皮球斜出。戰至23分鐘阿仙奴有黃金機會，史篤城門將畢蘭特想出禁區接波，但隊友梳爾哥斯阻住咗佢，艾朗藍斯乘機起腳笠射不過又高出，半場就咁一對零。
奧巴美揚梅開二度
下半場阿仙奴急攻，韋碧克54分鐘左路高速快放再傳藍斯，身處禁區嘅後者乖巧轉身起腳，點知步大力雄嘅史篤城後衞馬田斯恩迪及時殺上解圍。史篤城喺69分鐘幾乎先開紀錄，沙基利右路開內彎角球，角度刁鑽省中左邊門柱彈出。六分鐘後阿仙奴終於開紀錄，恩迪禁區侵犯奧斯爾，球證直指12碼，由奧巴美揚主射中鵠，Auba之後喺86分鐘入多粒，加埋拿卡錫迪12碼埋齋，槍手最後大勝3:0。