鍾嘉欣跟脊醫老公Jeremy結婚三年，育有歲半囡囡Kelly，婚後長居溫哥華的嘉欣向來喜歡小朋友，一直都希望為Kelly添個弟妹。鍾嘉欣上月初宣佈終於心願得償，成功懷上第二胎，並同時公佈離開無綫，專注家庭相夫教女。
手腳仍纖瘦
鍾嘉欣最近趁復活節假期，一家人去了夏威夷度假，昨日罕有地在Instagram分享了和囡囡在海灘玩耍的泳裝照。抱起囡囡的鍾嘉欣戴上帽子和黑超，激罕地穿上一件鮮紅色兩件頭泳衣。懷孕四個多月的她明顯見到肚凸凸，但手腳仍然纖瘦，身材弗到漏，至於有媽媽錫的Kelly就笑得好燦爛，還跟媽咪一樣都肚凸凸，十分可愛。搶盡囡囡鏡的鍾嘉欣更簡單留言，祝大家復活節快樂。本報昨日聯絡到她，她以英文短訊回覆：「正在放假，祝你有美好的一天。」
楊洛婷解放
至於另一位靚媽楊洛婷去年9月為樂隊Dear Jane主音Tim誕下囡囡Tanya後，半年時間已極速收身。她近日和朋友去了美國邁阿密度假，繼而再往古巴玩，更在當地影了一輯火辣辣泳衣相。她換了多套泳衣大晒美好身材，包括躺在沙灘上擺甫士，又畫心心圖案。
楊洛婷昨日以短訊回覆本報：「我生完去紮肚同好勤力做機，我之前去咗加拿大放低囡囡畀爹哋媽咪，之後就同朋友去美國邁阿密，跟住再去古巴，老公就留喺香港努力搵錢。髮型師都有一齊去，佢專登買相機幫我影相。」
採訪：嵐山
