每個更生人士，都有一個故事。好似貫中，由細到大志願係唔讀書，結果願望成真，入社團、撈偏門，再染上毒癮；為買毒品，賣盜版、爆竊、收陀地，只不過幾年光陰，便因傷人、襲警、藏毒及恐嚇勒索等，進出監獄八次。因吸毒導致身體轉差，貫中常尿頻兼有血尿，有次喺街頭偶遇昔日女性朋友，對方劈頭一句：「你變得咁樣衰！」
「一開始以為只係我玩毒品，最後都係毒品玩我。」後來佢主動接觸社工戒毒，仲加入無家者足球隊。當人生初現曙光，貫中重返戒毒中心，不過今次唔係戒毒，係做舍監，以過來人經歷幫助同路人。社區組織協會透過圖片和文字，記錄一班更生人的故事，「囚」更生人士圖文展將於4月6日至12日喺尖沙嘴文化中心地下展出。