【本報訊】還未有好好抱過、親過、牽過，BB未出世便回歸天國，這種切膚之痛，年初流產的梁太感受至深。17周半的細女確診「透納氏症」數天便夭折，梁太經歷引產陣痛後，又要為申領胎兒遺體與公立醫院周旋一個半月。雖然BB已安葬天使花園，但梁太盼醫管局能為前線員工制訂指引，讓有關程序更流暢，減輕對父母的二度折磨。
記者：李詠希
梁太去年底懷上細女Angel，因肚痛到聯合醫院求醫。至細女第17周時確診「透納氏症」（Turner Syndrome），是梁太噩夢的開始，「醫生話BB染色體唔完整，100%係透納氏症，BB出世後智力正常，但會特別矮小，同冇女性性徵，問我仲要唔要」。任職社工的她深知細女日後很可能受到歧視，身體亦會受到各樣痛苦，當日約定一周後流產，「我好自責，之後嗰幾日瞓唔到，不斷同佢講爸爸媽媽好愛你，但係我哋好驚照顧唔到你，怕妳問番我哋點解要生你出嚟令你痛苦」。
「一個生命 係我小朋友嚟」
梁太說，引產前忙於交代工作，但BB都很乖巧，無令她不適，「最後一日做完嘢返到屋企，就穿羊水，嗰刻我就知道BB要走」，憶及此，梁太又不禁大哭，「BB真係好錫我，選擇自己離開……但其實我哋已決定留番BB，如果冇穿羊水，（流產）手術我一定會走佬（不會做手術）」。隨後她到聯合接受引產，前後接近24小時、經歷5次塞藥及多次陣痛，才成功誕下死胎，「BB除咗眼冇開，個鼻係似我，下巴似爸爸，係一個生命，係我小朋友嚟」。
梁太稱，由入院一刻已向院方表明，會申請天使花園安葬細女，惟護士和病人關係組職員均不清楚流程，「（醫院）打電話嚟叫我親身去填表，去到又話可以email交。本身已交咗佢哋要求嘅墳場（天使花園）信件同殯葬商資料，隔幾日打嚟又要交多次。之後職員先認話冇經驗，我係第二個case」。
身心受盡折騰的梁太說，流產媽媽最痛的不止失去BB，繁複的申領BB遺體手續有如二度傷害，促醫管局盡快制訂申領未滿24周流產胎的手續指引予前線醫護及職員，讓他們及早熟習流程，減輕流產父母的痛苦。她說，辦手續期間，也要到處張羅BB的小棺材，「天使花園要求可分解嘅材料，加上尺寸好細，最終都係上網訂製」。
胎兒未滿24周當醫療廢物
經過一個半月的折騰，梁太終在3月下旬領回BB遺體，同日舉行簡單葬禮，細女成為天使花園第8個小天使，「如果我唔安葬BB，就要當BB係醫療廢物咁去燒，試問邊一個媽咪接受到？好多流產媽咪話羨慕我，我嘅BB可以安葬天使花園，真係唔知點答好」。她說，葬禮當日天氣很好，親友到場為BB祈禱和道別，她還在小棺材內放了可愛的手指公仔和親筆信。