華人騎師一哥梁家俊已升格為冇磅減的真正大師傅，級數地位再向前邁進一步，不過他仍然未有鬆懈，晨課依然落力操馬，冀爭取更多支持。
今日(1日)禮拜假期，梁家俊是極少數現身操馬的大師傅，其中還有個特別動態，就是他代操「劍斷浪」，此駒列陣周一(2日)沙田第七場二班1400米，由祈普敦策騎出賽，由於祈普敦冇到場，梁家俊幫師傅蘇保羅手，為「劍斷浪」踱步操練，作最後備戰，認真抵得諗。
「劍斷浪」上仗乃久休後轉投蘇保羅初出，負頂磅且頭二馬「天下為攻」、「加州議長」實力太強，「劍斷浪」落第合理，卻已收熱身之效，今仗操足再戰，且回師曾三勝之1400米，當然有一定機會。無欵梁家俊今仗有得操冇得跑，但來日方長，只要他keep住摸實「劍斷浪」，日後再親操多幾課，蘇保羅知道他摸熟此駒性能，未來總有機會交給家俊仔搏殺的。