安放喺球星基斯坦奴朗拿度（C朗）家鄉馬德拉島，機場出口嘅C朗「邪神」銅像，相信唔少人都見過。呢個喺上年3月完成嘅銅像，最出名嘅地方就係一啲都唔似C朗，個面相仲非常奇異，惹嚟大量負評，亦令銅像造型師山度士（Emanuel Santos）一夜成名。被外界猛烈抨擊，山度士都覺得好唔開心，最近佢決定要一洗污名，再造一次C朗銅像求翻身。
汲取咗大量批評，山度士今次都好畀心機去做，老實講成品出嚟真係好難談得上係完美，以100分滿分嚟講，上次「邪神」銅像係0分嘅話，今次都有40至50分嘅，起碼拎TAKE2銅像出嚟，唔話畀你知係邊個的話，你都會估到應該係C朗嚟嘅。