曾經效力阿仙奴同AC米蘭嘅法國中場法米尼雖然喺足球事業方面嘅發展普普通通，上季約滿水晶宮之後要等到今年二月先以自由身形式喺基達菲落班，不過佢喺商界發展不嬲都唔錯。法米尼2008年起做咗一間專門製造石油代替品嘅化工公司合夥人，而且公司發展得唔錯，呢位34歲中場嘅身家隨時仲多過部份當打嘅球星。
不過法米尼最近接受法國《隊報》訪問時就話自己唔係外界所講咁有錢：「我一定要澄清，我銀行戶口絕對冇300億歐元（約2,900億港元）咁多，呢個數字只係反映咗我間公司嘅市場價值。」其實法米尼又唔使咁謙嘅，學「渣渣輝」話齋︰「你𠵱家冇但係將來會有」吖嘛！