有人話今時今日嘅香港，食花生嘅人太多，仗義執言嘅人卻太少，但總會有正義之士嘅。一名上年紀、操純正廣東話嘅女子近日搭廉航AirAsia由吉隆坡前往香港，唔畀錢卻大模廝樣霸佔升級座位，空服員勸走後再返轉頭，有港男忍唔住指摘港嬸「唔知醜」，其間港嬸多次反斥「關你乜事」，但港男不斷指罵下，終於肯返回原位。
正義Next哥：死返去 唔知醜
八方相信，空服員每日都遇到唔少呢類難搞搭客，屢勸不聽都係好無奈，難得有其他搭客幫忙，當然會好感激，所以為咗答謝呢名港男挺身KO野蠻客，空姐主動送水道謝。唔少網友批評港嬸「影衰港人」，力讚片主鬧得好。
原來呢名被網民形容為正義港男嘅係人稱「Next哥」嘅網台主持兼作家林匡正，佢仲喺fb撰文述詳情，話喺空姐勸港嬸返回原位前，已經有兩個空少趕走過，點知仲有第三次，結果早已鄙視港嬸醜行嘅佢忍無可忍下，終於企起身指摘港嬸：「死返去自己位啦，一次兩次三次都係咁，知唔知醜㗎？」結果就擊退港嬸。
識睇睇留言
Annie Pun：面係人哋畀，架係自己丟。羞家。
Tung Lau：起飛後冇人坐位咪由得佢坐囉，我見好多人都係咁，不過條大媽瞓係度又難睇啲，俾人趕都唔走就衰樣啲。
Ho Ming Ho：……唔畀你升級係正常道理，想用最低價錢又要坐得高級？！
Cherry Cheung：低質素的人是不分國籍的。
Jackie Yung：好肯定呢班空中小姐、少爺一定好開心、至少有人肯出聲、小爆呢啲無賴人渣！
畢思索：最終失禮香港人啦～不論新舊香港人自重自己行為好啲！
資料來源：《蘋果》網站