一連四日嘅復活節假期開始，高官同立法會議員會有乜節目？去戲院睇早場可能係唔錯嘅選擇。有讀者噚日朝早就喺數碼港間戲院，見到最近忙緊取消強積金對沖同派錢問題嘅勞福局局長羅致光入場睇9點05分、「知名」大陸女星景甜有份出演嘅新片《悍戰太平洋2：起義時空》。
讀者離開時又再撞到財委會主席陳健波，仲見到買咗飛睇同一套戲嘅波哥，同平日開財委會時一樣分秒必爭，催同行者快啲入場。一連撞到兩政界名人，該讀者相信因為嗰度人流較少，令政界中人唔使驚撞到好多人，而今次羅致光同波哥都係睇早場，每張飛只需65元。
睇番網上影評，有網民睇完套戲話有啲失望，因為套戲由講以機甲獵人同駕駛員合作守護太平洋，變成一部中國人救世界嘅中國化荷里活片，估唔到佢哋嘅電影選擇都好政治正確。