黃埔2019年，變天嘞！消息話呀，喺黃埔東盤踞多年、曾遭青年新政游蕙禎挑機嘅經民聯梁美芬會喺明年區議會選舉退下火線，交棒讓位後生仔。至於上屆喺黃埔西勝出，有「鄺葆葆」稱號嘅前青年新政成員鄺葆賢醫生，八方聽聞建制派擬派曾喺青衣區選敗陣嘅工聯會友好出戰狙擊。
距離明年底嘅區議會選舉，仲有一年半時間，唔少想挑戰區選議席嘅人士準備就緒。黃埔花園喺屬九龍城區議會分為兩個選區黃埔東同黃埔西，2007年起喺黃埔東當選區議員嘅梁美芬聽聞唔再爭連任，交棒畀經民聯後生仔李超宇。早排李超宇就替民建聯鄭泳舜喺黃埔助選，以示對建制派團結嘅忠誠。
本身喺城大教法律嘅梁美芬2007年勝出區選後、2008年贏埋立法會，雙料議員嘅佢更因捉老鼠成名，獲頒「鼠王芬」稱號。聽聞熟悉《基本法》嘅佢有機會喺某重要建制架構佔一席，八方早前問過佢，佢只係笑稱一切仲未作實。
青壯建制派或戰鄺葆葆
而喺黃埔西嘅公立醫院醫生、31歲嘅鄺葆賢，上屆以傘兵姿態成功剃建制派眼眉，據聞建制派誓要搶回議席，有意派出上屆喺葵青區青衣敗陣嘅33歲鄭曉玲出戰。鄭當年派糭又量血壓，搞咗個「凝匯青衣」組織做埋召集人，點知搞足年半都係輸，凝匯青衣facebook已再無運作，當時有消息話鄭同工聯會關係密切。
從小到大住喺青衣嘅鄭似乎已由青衣「移民」黃埔，近月開咗個fb戶口，有張黃埔號嘅相，戶口朋友只有一個。八方問佢係咪想喺明年區選挑戰鄺葆賢？佢只稱「言之尚早！」鄺葆賢同游蕙禎截稿前就未回覆。
李八方