律政司前司長袁國強同前商務及經濟發展局局長蘇錦樑，即將重操法律界故業。本身為資深大律師嘅袁國強會做「自僱人士」，Greg蘇則返自己律師樓工作，已獲前任行政長官及政治委任官員離職後工作諮詢委員會批准。
Greg蘇返律師樓
法律界流傳袁國強離開熱廚房後，會重返Temple Chambers私人執業。委員會強調，袁不得喺離開政府嘅一年內，喺牽涉或針對政府嘅索償、訴訟、索求、法律程序、交易或談判中代表任何人，或參與有關政府事宜嘅游說工作；除獲特首事先書面許可，否則不得洩露或傳達佢喺履行職務期間知悉嘅敏感資料。
Greg蘇則喺1997年創立律師事務所，轉任局長後事務所改名為「蘇龍律師事務所」，4月3日起佢會重返事務所任顧問，同時擔任英傑華人壽保險公司獨立非執董。