寫過唔少文章批評政府唔派錢嘅立法會前主席曾鈺成，又嚟料。噚日喺《am730》專欄借「阿茂」同「波叔」嘅對話，嘲諷娥班子「補漏拾遺」係「阿茂派餅」，認為將原先嘅有針對性原則，同後來嘅補漏拾遺加起來，變成比量子力學更複雜嘅措施，「奇妙之處是它並非全民派餅，卻不會派漏任何人」。
曾鈺成喺文中話阿茂有1,200個餅，老闆娘叫佢派畀村民，要同村民共享，苦惱整餅容易派餅難。路過嘅波叔話按人頭均分咪得囉，點知阿茂話老闆娘落咗聖旨，派餅要有針對性，唔可以全民派。
之後波叔獻計，但都未獲接納，最後話「香記的掌櫃」發明咗一款奇妙派餅藝術，叫做有針對性加補漏拾遺，「凡是買一送一和派愛心餅兩項計劃未有覆蓋的村民，每人派餅四個；另外，凡是已獲派餅但不足四個的人，通通補派差額。這就人人有餅，一個不漏了」。
寸緊邊個？大家心中有數！而曾鈺成噚日再喺自己fb轉貼此文，寫道：「阿茂整餅——冇嗰樣整嗰樣……」