葵涌廣場的小食戰場越來越激烈，場內的巨型垃圾桶，總係堆滿膠碗膠叉，好熱鬧。統計話，香港每日生產190噸即棄餐具廢料（大概係12.6架雙層巴士咁重呀！），而單係葵涌廣場，每間商舖每日大概用400至500個即棄食具。
呢兩日，喺二樓小食區扶手電梯往三樓三角口位置多咗個機械人同一班人，係咁攞住啲叉叫你做個有叉用嘅人。原來佢哋係參加咗賽馬會低碳創聚（ https://www.coil.hk/en/），其中一隊的創新小組，發明咗部餐具租借機械人，只要你埋去，機械人（裏面有個真人）就會執套可洗的碗同叉匙畀你搏殺，食完歸還作清潔，又是一條好漢。餐具由餐具清潔商「we use」及「洗碗筷」提供。
測試時間得番周四五兩天，時間下午三時至八時。
地點：葵涌廣場二樓小食區扶手電梯往三樓三角口位置（Tiny微影玩具對面）
facebook：商場餐具租用
記者：陳慧敏
全新旅遊專頁，即like籽想旅行： https://fb.com/travel.appleseed