前日講及同學K投資有24%年息，問佢係甚麼冬冬，佢答：Yield-Enhancement Investment，更加唔明，直至佢講係以今天市價買入騰訊、平保呢兩隻股票，假如股價跌至譬如騰訊400元，佢就要以今天價（譬如係460元）接貨，承諾維持三個月，如果騰訊、平保股價一路上升或者唔跌破行使價嘅話，投資者就會收息24%。唓，咁即係2008年雷曼風暴之前嘅流行產品ELN啫，今日改咗名稱，在銀行嘅私人銀行部/財富管理部又再還魂，大受歡迎咁講。總之牛市期間，係人都貪高息，直至爆煲為止。（按：騰訊在3月23日大跌，同學K可能要高價接貨。）
十年前，左丁山訪問過一位醫生，訪問完畢後，佢問番左丁山之投資意見，問佢買過乜，佢好坦白話Accumulator令佢損失慘重，已經唔見咗三層樓，佢又話一位同行蝕咗八千萬，要從頭來過。好彩香港醫生短缺，一啲醫生在股市輸了，還可以在醫務所搵得返，例如輸掉八千萬元嘅醫生，據說調整收費，同佢傾偈三十分鐘就要收三四千元，而且名人病人好多，醫生好易成為「月球人」，病人一入房就知道計時鐘響起，未請教醫生啫，已有心理壓力。
當然係叻醫生先至可以成為月球人，星球人，唔係個個醫生都得，或者願意如此，左丁山識得幾位醫術高明醫生，知道病人來自最基層之後，近乎贈醫施藥㗎。
講番高風險高回報產品，ELN、Accumulator之類，因為存款長期無息，又試興旺番，投資者收高息之餘，請記住雷曼都竟然會破產呢個現實，唔好去得太盡。其實有雷曼風暴之後，各地金融監管機構都有矯枉過正之弊，規矩多籮籮，令銀行經營成本大增，名義上係保障投資者，實質上十分擾民，費時失事。左丁山最近將一筆外弊存款賣掉，換番港幣存款，在左丁山做銀行職員年代，講一次電話兩分鐘就搞掂。點知依家銀行話先要去銀行行一趟，開一個multi-currency account，然後聽RM（客戶經理）向左丁山問一連串問題，有電話錄音，足足前後一個鐘先至完成一筆好簡單嘅交易。次日還有下文，RM來電：「銀行合規部話我講漏咗一條，要重新電話錄音！」真係保佢大，但亦知金管局係好煩，銀行要依足規矩。同學K話佢個女在外資銀行做合規工作，返工後知道每日要跟住指引聽RM與客戶對話錄音，每日聽十小時捉錯漏，女兒做咗一個月就辭職，話怕精神失常喎！