因為黃牛黨問題，令黃子華嘅棟篤笑門票極度難買，難到子華神都出聲，希望政府正視問題，如果要等特區政府做嘢可能等到蚊瞓嘞！實政圓桌田北辰立即響應子華神嘅號召，準備喺下月11號嘅立法會大會提出質詢，跟進炒黃牛問題！
二少條問題其實好簡單，就係問吓政府，會唔會考慮買飛實名制、提高賣黃牛嘅罰則、同埋點樣打擊網上賣黃牛問題。佢將自己條問題放咗上fb後，立即引起網民熱烈討論，唔使一日就有過百留言。更難得嘅係，網民嘅討論相當理性，譬如有人點出行實名制會衍生嘅問題。查實大家講多啲都係好事，至低限度都要畀政府聽到，唔好再蹺埋雙手唔理。