早排先有操粵語女子喺紐約施展「人肉霸車位」神功，被網民狠批「X出國際」，今個月中再有人肉雪糕筒現身沙田，畀車cam拍低，雖然片段解像度低，睇唔清「雪糕筒」容貌，不過錄低嘅對話令網民大讚片主EQ高。
當日司機將車駛入怡成坊、巴士總站旁嘅泊車位，眼見右手邊仲有個位，諗住泊埋去之際，見到一位男士企正喺中間，全無讓開之意。以下就係兩位主角嘅對話：
雪糕筒：有架車嚟緊
斯文人：嚟緊？
雪糕筒：係呀，我、我、我霸咗個位先
斯文人：人霸㗎？
雪糕筒：唔係……
斯文人：呢個人位（定）車位呀？
雪糕筒：……唔係……
斯文人：唔好咁老土啦。我畀你、我畀你。好老土呀，下次唔好咁做喇。
然後片主開車再兜過，繼續喺茫茫車海之中，搵一個車位。唔使粗口、冇肢體動作，完美KO人肉雪糕筒。
【識睇睇留言】
葉士：呢啲情景，喺香港揸開車嘅都見怪不怪啦！
Dannykktsang Tsang：如果畀我叫佢過主，呢個人位定係車位？
資料來源：《蘋果》網站
