隔牆有耳：
有法律超人冇塞車 - 李八方

立法會噚日雖然有特首答問大會，但場內都總算平靜，反而大樓外就有啲意外發生喎！

話說午飯時間，立法會外嘅添美道呠聲四起，八方第一時間去八，原來一架的士同一架私家車喺立法會外近添美道迴旋處路口有些少碰撞，兩車司機落咗車，研究點解決，塞晒成條添美道！
咁啱「法律超人」謝偉俊嘅座駕都因為呢單嘢而塞咗喺立法會停車場出入口，呢個時候，謝偉俊終於忍唔住出「口」，唔使換三角褲嘅，迅速落車上前睇吓發生咩事，仲以專業律師身份勸兩位司機大佬將座駕駛埋一邊，免得阻塞。
經法律超人調停，兩位司機大佬聽教將車駛埋一邊，其他車先至行得番，謝偉俊當然上車離開，估唔到佢喺處理離婚方面係專家，連交通糾紛都難唔到佢。